TAMASHA DO HAZAAR GYARAN

February 1, 2011

Yeh meree pehli urdu post hay, aur mein koshish karoun ga kay mein ussi lehjay mein likhun jiss tarahan kay mein engrazi mein likhta houn. Mein afsos say kehta houn kay meree urdu itnee achee nai hay jitnee meree engrazi magar aaj say inshAllah mein apni madri zabaan dil say parnay aur likhnay ke jud-o-johad karoun ga!

Mera aik dost hay, uss ka naam Haider Miraj hay! Woh aik aisa insaan hay jiss mein Allah nay bohat sari khubian rakhi hein! Teen din pehlay, uss nay aik takreer kee Tamasha Do Hazaar Gyaran kee Opening Ceremony mein, aur uss takreer say mujhay andaza howa kay mein aik aisee cheez ko bhool betha houn jo meray Pakistani honay ka daleel hay! Aur woh hay Urdu! Aik aisee methee zubaan jis ko sun kar dil khush ho jaey! Aik aisee takatwaar zabaan jiss say dil dilair ho jaey! Aik aisee zuban jiss say ankon mein ansoo bhar aein! Aur yeh baatein, na janay kyun, mein bhool betha tha! Aur agar mein aur merey dost Pakistani honay ka hak adaa karna chahatay hein, agar hum Pakistan ka mustakbil behtar karna chahatay hein phir humay iss zubaan ko apni samajh kar istamaal karni ho gee! Mujhay mauf kejeaya ga, meree muzakir muanis zara kharaab hay, kyun kay mein nay urdu chati jamaat say parni shuru kee, aur uss waqt mujhay iss baat ka ahsaas bilkul nai howa kay yeh sirif aik zubaan nai, bulkay aik auzaar, hatiyaar hay!

In pichlay char dinun mein meree dunya mein aisay aisay log aey, jin ko mein nay FAST mein honay kay bawajood nahi dekha howa tha, mugar woh log mere leyay itnay azeez ho gaey kyun kay un sab ka maksaad Tamasha Do Hazaaar Gyaran tha! Aur har kisi nay bohat izaat-o-ahtaraam say mujhay rakha aur meree madad kee! Hur kisi nay muskaratay huway kaam keya aur un kay andaaz say mujhay mehsoos howa kay un kay dil chamak rahay hein! Un kay khoon mein aisaa jazbaa dor raha tha jis ke wajah say bila jhujak apni neenday haram kar tay rahay, FAST kee tesree manzil kay ultay hath kay pehlay kamray say lay kar FAST kay hur konay tak dortay rahay, sirf isleyay kay Tamasha Do Hazaar Gyaran un ka maksad ban chuka tha!

Mein daat deyta hun un azeem shakhsiat ko jinhon nay Tamasha shocha aur banaya! Yeh koi mamooli baat nahi! Meray ilm mein koi aisa “event” (iss kee urdu mujhay nai yaad aarahee) nai hay jis kee aik saal mein itnee mashoori hoee ho kay agalay saal uss mein shirkat karnay walay chaar guna ho jaein! Meray khayaal mein to iss kee aik wajah yeh hay kay iss kay bananay walaon ke neyat itnee saaf thee kay Allah Talaa nein iss mein aisee barkat daal di!

Meray khayaal mein aaj kay leyay itnee urdu kafee hay, kyun kay ab merey dimagh mein ilfaaz khatam honay lagay hein, aur mein nai chahata kay mein Tamasha kay sath iss tarhaun karon! Magar mein aik dua say iss ko khatam kar na chahata hun! Aey Allah, Tu hamaray dilon kay haal janta hay, aur humein yakeen hay kay Teree waja say hee yeh mulk aaj tak kaim hay, uss kay bawajood kay hazarun, lakhun log iss ko kha kha kar hazaam kar rahay hein! Tu hee hay jo hamari hifaazat karta hay! Aur Tu hee hay jiss kay agay hum hath utha kar mangtay hein! Aey Allah Tu hamaray tamaam gunahun ko mauf farma kar is mulk kay haal par reham farma! Humaray dil, dimagh, aur jism mein itnee takaat dal kay hum har mushkilaat ka aisa samna karein jaisa kay Tu chahata hay! Hum bohat kamzoor hein, hum bohat gunahgaar hein, magar hum Teray Rehman aur Raheem honay par yakeen rakhtay hein! Tu hee hamara Razik hay aur Tu he hamara Malik hay! Aey Allah Tu iss mulk ko aisa banaa day jiss mein Teree razaa kay sawa koi aur kaam na ho! Tu iss mulk ko aik behtareen misaal bana jin say dusray mulk walay bhee mutasir ho kar Islam kee taraf barhein! Mere dil mein uss din, jab mein Pakistan ka jhanda lay kar chal raha tha, woh insaan yaad aey jinhon nay, marnay kay bawajood jhanday ko girnay na deya, aur un Sahaba ka jinhon nay Islam ka jhanda dunya kay konay konay tak pohanchaya, aur un shaheedon ka jinhon nay iss mulk ko Islam ka kilah samajhtay howay apni jaanein day dein! Ya Allah mujhay aur meray har bhai aur bhain ko un jaisa bana day!

Ya Allah jo mujhay khuda cheyay tha woh mujhay mil gaya, Tu jo banda chahata hay, woh mujhay bana day!

Advertisements

8 Responses to “TAMASHA DO HAZAAR GYARAN”

  1. Haseeb Yahya Says:

    bht aala ghazi
    cha gayae ho

  2. Babar Ahmad Says:

    AMEEN!!!!

    Ghazi nice1. finally u wrote in minglish. 😛

  3. kdee Says:

    This reminds me of minglish announcement you made after shamechiraghan.That was cute 😀
    Awesome effort 😀
    Waiting for more and more 😀

    • ghaziaitizaz Says:

      🙂
      Thanks Khadija! And yeah that annocement 😛 i dont know what got into me 😛 i just got confused all of a sudden! haha. At first when i came to pakistan i use to think in english and even when i had to write urdu i would first think in english n then translate it in my head. But now after all these years I’ve started thinking in urdu. Our mind has a language too, and now mine has learnt two 😀

  4. Haider Miraj Says:

    shaied insan buniyad ka ghulam hota he ya buniyad us ki per jo b ho haqeeqat kabhi bhi talkh/sehl ik waqt me ne hoskti …. wast garma 2009 me jab Tamasha ka khyal mere zehn me aya aur us ko haqeeqat bnane k liye mujhe wo tamam log mile jinho ne iski ik bache ki tarah parwarish ki aur mujhe ye ihsas dilaya k jab bache bare hojaye to bap batate hain ghar wohi rehtae hain main bap tha hun per ghar ab sab ka he ….. koi mujhse pocche tamasha ne tumhe kya dia to main kahon ga k dia to bht kuch … Dr. Aftab k sath chalte hue wo ik khaton jis ne a k kaha u r very inspiring se le k wo bacha jis ne mujhse interview kerte hue mujhe btaya k main bht inquilabi hun *jo k main ne hun :p, per jis cheez ne meri ankhon me pani dia wo ik shaks ka ye blog jis ne urdu meri waja se likhni shuru ki, bht khoobsorat tohfa he us shaks ka jise Allah ne bilawaja izat di aur uski wuqat ma siwae is k kuch b ne k wo shaam-e-chiraghan me ik nuqr pe bghair dia uthaye ye sochta rha k maine in tamam logo ki mehnat ka haq ada kia ya ne , khair shaied mere lafzo me taseer baqi na rhe magar main ye lazmi kahonga k insan ko apne asal k humrah rehna chahiye, We shouldnt escape from our orignality,
    Ap k waqt ka bht shukriya

    Duao ka talib

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s